طرفِ العين ، شعر: نصير أحمد الريماوي

طرفِ العين ، شعر: نصير أحمد الريماوي

مِنْ خلف الشباك يا حلوة طلي وحاكينا
غيابك طال وبعدك عم بتجافينا
سهران الليل ما غمضنا عَينينا
يا بنت الناس صُبِّي القهوة واسقينا
خايف ليكون حبيتي الغير علينا
من بين شفافك كلمة حلوة بِتِحيينا
وبْتِشفي المجروح وبتحيي الأمل فينا
لوما جمالك لا رحنا ولا جينا
يا أم الجدايل لعيونك شوقتينا
يا محلا الزين اللي بينور ليالينا
بيزداد الشوق وتدب الحياة فينا
و برمش العين نكتب أحلى أغانينا
في ظلام الليل ياما مشينا وحكينا
وصهيل الخيل تغنّي غنوة تْبَكينا
لأبطال المجد والآلام اللي فينا
وبأُم العين شاهدنا مآسينا
على وادي العين وَرَّد مكحول العينا
تايلاقي الزين ويملي الجَرة يسقينا
مزَنَر بالدَّين للوطن حالف يحمينا
تقدح شرار عيونه على المزيونه
في رأسه ثار وفقلبه نار المَرتينَة*
ثورة بِتْشَعِل شموع الفرح تِضْوينا
من طرف العين شفنا الويلات حوالينا
على طرف العين حملت طفلة الزوادة
للثوار الأحرار وقت الأصيل تنادي
كانوا ابعاد عن عيون الحُسادي
في غلس الليل وصلت منهم إشارة
يلا يا أحباب عليهم شنوا الغارة
لعلع رصاص وعلت أصوات الأبطال
والإيد بالإيد خاضوا المعركة في الحال
زيِّنوا الدار برجوع العريس وهَنونا
بالثوب المطرز كَفّنتهُ الأم الحانونة
مُخضّب بالدم ارتوت منه الزيتونة
وبكت عليه شجرات التين والليمونة
وأم الشهيد تزغرد والسما باتت حزينة
تنعي الشهداء وبتقوي العزم فينا

• المرتينة: اسم بندقية بريطانية قديمة استخدمت في العمليات الفدائية.