قصيدة عين حورس ، بقلم : إيزيس غانم

قصيدة عين حورس ، بقلم : إيزيس غانم

لو انت حقيقي مجنونى
فانا يا قيسي مش ليلى
أنا ڤينوس …
وسر جمال بنات حوا ف تكوينى
هتسألنى …وإيه السر ..
مش قايله
أنا حوا وانا القوة
وانا اللى شموسي ف جبينك
تمللى بحسنى انا طلٓه

…أنا إيزيس
هرم رابع…تشوفه عينيك
وروح عايشه ف روح أوزوريس
ونبضى ف روح بنات جنسي
حكٓم …محفورة فى وريدهم
ومتسلسل عليها ألوف من المتاريس

عيونى نهار لعين حورس
وصبح وضى
وفرحة عيد لطفل يتيم
بلبس جديد
ونسمة صيف ونقطة رى
أنا مجرة لأكوانك
أنا الجنة اللى مالى زى

وأنفاسي جناين نور ونارى سلام
كلامى سكوت وصمتى كلام
أنا اللى صاحبت مكتوبى
وانا الصابرة على الأيام
وانا اللى بلم اوجاعى
وأطبطب ع الوجع واضحك
ف وش الأه
وبفرد طولى ف الأحلام
وانا اللى شايلة روح أوزوريس
وعديتها جبال وبحور
أنا نسخة بنات الحور
وجوه وتينى …
غير إيمانى …غير دينى ..
وغير إسمى…
وعزة نفسي مش شايلة
فلو هتعيش ف دور القيس
انا مش هبقي ليك ليلى .
إيزيس غانم
قصيدة عين حورس