شبكة فلسطين للأنباء – شفا الشبكة الفلسطينية الاخبارية | وكالة شفا | شبكة فلسطين للأنباء شفا | شبكة أنباء فلسطينية مستقلة | من قلب الحدث ننقل لكم الحدث .
خلّونا نحكيها ع المكشوف ، الإبداع مش شِلة ، بقلم: رانية مرجية
وأنا قاعدة على صحن قهوتي الصبح، مش لحالي، كان في كمان شوية قهر وشوية صدق عم يغلو جنبي…
لأنه بصراحة تعبنا من المجاملات، وتعبنا من “تمسيلي وامثلك”، وتعبنا من كِذبة إنو كلنا منحب الإبداع وبنحترم الرأي الآخر… وهو بالحقيقة، اللي مش من جماعتنا، بنقطّعله جناحاته قبل ما يطير.
احكوا بصراحة، ما كلنا شفنا كيف بيصير تقييم النصوص؟ مش حسب شو كاتبه، بل مين كاتبه!
وإذا اسمك مش معروف، أو مش من الشِلة، أو مش عامل لايكات للشلة الكبيرة، فحتى لو كاتب شي يشهقله القلب… بيروح للزبالة الأدبية.
والمصيبة؟ نفس الناس اللي بيقصوا غيرهم، هني اللي بيرفعوا شعار “حرية التعبير” و”دَعوا الأدب يعيش”!
طيب إذا الأدب مش طالع من حضن جماعتكم… بصير فوضى؟ بصير مريب؟ بصير “مش ناضج بعد”؟
يا جماعة، خلونا نهدى شوي. خلونا نحترم بعض. الإبداع ما بيطلع بس من مطبخكم، ولا من صالون الثقافة تبع نسيب خال الأستاذ.
الإبداع الحقيقي بيطلع من القهر، من الغربة، من الحلم، من الوحدة، من الغُربة جوا الأوطان، ومن ناس ما حدا سامع فيهم بس بيكتبوا من وجع حقيقي.
ما حدا معه مفاتيح الجنة الأدبية. وما حدا معه الحق يمنع غيره يحاول، يجرب، يكتب، يصرخ بطريقته.
واللي بينجح… بنقول له: يعطيك العافية. مش “ليش هو؟!”، بل “ليش مش نحنا كمان؟!”
كلمة أخيرة من صحن القهوة:
إذا موهبتك بتخاف من المواهب الجديدة… فهي موهبة هشّة.
وإذا بدك تظلّك تحاصر الناس بمين بيعرف مين… فأنت مش مثقف، إنت موظف عند مزاجك.
صباحكم صدق،
وصحن قهوتكم حرّ
“صحن قهوة”:
تعبير دارج وشعبي يُستخدم في بعض المناطق، خاصة في بلاد الشام، للإشارة أحيانًا إلى “فنجان القهوة” أو إلى جلسة شرب القهوة.
لكن أصل العبارة يعود إلى:
- الصحن الصغير المرافق للفنجان: حيث يوضع الفنجان عليه (ويسمّى “صحن الفنجان”)، فيُقال أحيانًا بالعامية “أعطيني صحن قهوة” ويُقصد بها “مجموعة الفنجان مع الصحن”.
- أو تكون استعارة شعبية للموقف ككل، مثل: “قعدنا صحن قهوة” أي جلسة قهوة.
- وفي بعض اللهجات القروية أو الشعبية، يتم إطلاق “صحن” مجازًا على الفنجان نفسه.
النتيجة:
• الصحيح لغويًا: فنجان قهوة.
• الشائع شعبيًا في بعض المناطق: صحن قهوة، لكنها استعارة أو تعبير دارج وليس استخدامًا فصيحًا للكلمة للتوضيح
