شبكة فلسطين للأنباء – شفا الشبكة الفلسطينية الاخبارية | وكالة شفا | شبكة فلسطين للأنباء شفا | شبكة إخبارية فلسطينية مستقلة تنقل الحدث من قلب فلسطين والعالم العربي على مدار الساعة.
تحوَّل عُرسِي إلى مأتم
شعر: نصير أحمد الريماوي
لِفِّيني يا أمي لِفِّيني
وبعلم بلادي غطيني
وبِغْصون الزيتون وورقه
مع ورق التين سَجِّيني
في رحلة طويلة أنا ذاهب
كي أُسِدد للوطن دَيني
ودِيري بالك على الأشجار
المزروعة حوالين الدَّار
لا تنسي نَصيب الجَار
مِنَ الثَمر والأولاد الصِّغار
ولا تنسي إرث أجدادي
اللي بسواعِدهم عمَّروا بلادي
لا تنسي كيف قصفوا خَيمَتِنا أمس؟
وكنتُ الضحية ودمي غرَّق بدلة العُرس
خلِّيها ذكرى للتاريخ ولَلِي يُضحي بالنفس
حُطِّيها على باب الخَيمة
مَضرب للشباب أُولي العَزيمة
والناس بعد ما كانوا يِهَنوني
صاروا بلحظة لجنَّات الخُلد يزفُّوني
وعلى أكتافهم في النعش حملوني
وبالهُدوم اللي غطاها الدَّم شيَّعوني
ومن أمام خيمة عَروسي سيَّروني
وعَروسي بلباسها الأبيض مثل الملاك
ودموعها على خدودها تسيل
وهي بتودعني وعلى نعشي تَميل
تبكي من ألمها مكسورة الجناح
على اللي تركها وودع الدُّنيا وراح
مرفوعة الراس دوم وبنفس أبيّة
بالسّواد موشحة وراضية ومرضية
أودَعتِك الله يا “أسماء”* يا أحلى صَبية
ضاق الوطن وضِقنا بالأعداء
والعيشة صارت مُرَّة وهدموا البِناء
أوصيكِ يا أمي خلِّي خَيمتي نادي
سوِّيها مَضافة للرايح والغادي
وعلِّقي فيها بَدلَة عُرسي وجهازي
تروي للأجيال عمَّا حلُّ ببلادي
واشعلي شمعة في زوايا الخيمة
ذكرى لتضحياتي واستشهادي
- – أسماء: هو اسم خطيبة الشهيد” مهند فراونه” 25 سنة الذي استشهد يوم زفافه بتاريخ6/6/2026م في خانيونس جنوب قطاع غزة في يوم ذكرى النكسة، حيث قصف الاحتلال خيمته التي تواجد فيها، وقد نَصبها للزواج فيها، وابتاع جهاز العرس، لكن باستشهاده تحوَّل الفرح إلى مأتم.
